كشف توزيع محاكم القاهرة والجيزة 2021

 

خطوات
تقديم الإقرار الضريبي  للمحامين

خطوات تقديم الإقرار الضريبي  للمحامين

بداية أي محامى لديه بطاقة ضريبية يجب أن يقدم الإقرار الضريبى حتي لو كان في فترة الإعفاء وهي خمس سنوات ( سنتين جدول عام + ثلاثة ابتدائي ) .

--------------------

1- لازم يكون معاك إميل ياهو أوهوتميل أو جى ميل  ( ولازم تكتبه في ورقه وتحتفظ بيها ) ، ولازم يكون معاك فيزا للدفع كارت  أو كاش ، متستعملش فيزا ميزا بتسحب الفلوس ومش بتمم العملية ، ولازم كمان يكون متصفح جوجل كروم أو فايرفوكس آخر اصدار لإستكمال كل الإجراءات .

2- هتدخل علي البوابه الالكترونيه للخدمات الضرييبة من اللينك ده

https://eservice.incometax.gov.eg/etax

وهتتبع الخطوات الآتي :

3- التسجيل كممول

 وهيطلب منك تملي البيانات

4- رقم التسجيل الضريبي وده بيكون موجود في ضهر البطاقة الضريبية اللي هو جنب تاريخ عمل البطاقة الضريبية وانتهائها .

5- الرقم السري أو رمز الدخول ( وخد بالك لازم يكون أول حرف كابيتال وليس صمول ) والرمز لا يقل عن 8

( ومتنساش تكتب إميل الضرايب في ورقة خارجية وتحتفظ بيها ) .

6- بعد كده هيدخلك علي صفحة أخري وهتملي شوية بيانات الإسم رباعي -  رقم التليفون -  العنوان -  العنوان مرة أخري رقم البطاقة - رقم الفاكس هتكتب اي ارقام 0000000 -  وفي خانة الإميل الياهو / الهوتميل / الجى ميل اللي اتكلمنا عنه في البند واحد (  وخلي بالك الارقام كلها تكتبها بالانجليزي ) وهتختار شخص طبيعي وليس اعتباري .

7- بعد كده هيبعتلك رسالة علي الياهو / الهوتميل فيها رقم ( رمز ) هتنسخ الرمز ده وتلصقه في الخانة المخصص ليه في إميل الضرايب .

8 - هيقولك تم التسجيل بنجاح وهيعملك خروج من إميل الضرايب .

9- هترجع تاني تكتب إميل الضرايب والباسورد ( بس خد بالك الباسورد أول حرف منه كابيتال وليس صمول ) .

10 -  تم تسجيل الدخول بنجاح وبعدها هيطلب منك تسدد قيمة الاشتراك ، هتضغط عليها وهتظهرلك صفحة تاني بالسداد هتدخل رقم الفيزا - وتاريخ انتهائها - والرقم الثلاثي  أو الرباعي اللي موجود في ضهر الفيزا ---- ولازم يكون فيها رصيد كافي لإتمام السداد -  بعد كده هيبعتلك رسالة علي الموبايل المرتبط بفيزا السداد ( الرقم السري المؤقت للفيزا ) هتكتبه  وبعد كده بيتم الخصم ومبروك تم السداد بنجاح .

11- ندخل بقي علي أهم حاجة الا وهي كيفية تقديم الاقرار ،

هيظهر لسيادتك خانات هتدخل علي خانة ( ضريبة الدخل ) اللي موجودة بين كلمتي ( الرئيسيه ) وضريبة القيمة  المضافة ، هتختار ضريبة الدخل ، هينبثق منها خيارات هتضغط علي كلمة ( إقرارات ضريبية ) ، ولو مظهرتش معاك كده لم يقبل منك سداد الاشتراك وهتحاول معاه تاني بس قبل ما تسدد تاني اعمل خروج من إميل الضرايب وادخل تاني لان الموقع بيحتاج تحديث ، ولو ظهرت معاك كلمة اقرارات ضريبية كده انت سددت واتبع الاتي :

12- الاقرارات الضريبيه ظهرت معاك - هتختار اول اختيار ( الاقرار 101 ) الخاص بالاشخاص الطبيعي ثم

13- تختار سنه الاقرار 2020 ولو مقدمتش اقرار 2019 تقدر تختار 2019 ومن ثم اقرار 2020 ثم

14- هتظهر معاك صفحة الاقرار الضريبى علي صافي دخل الاشخاص الطبيعيين ، وهتظهرلك خيارات كتير هتختار منها ( إيرادات المهن الغير تجاريه  ) وملكش دعوه بأي خيار تاني شغلنا كله بيتم في خانة إيرادات المهن الغير تجاريه بالتتابع

15- بعد دخولنا علي ( الايرادات المهن الغير تجارية ) هتظهر معانا صفحه ( إيرادات المهن غير التجارية - غير المؤيد بحسابات منتظمة ) هتملئ فيها اربع خانات فقط

الخانه الاول :  المهنة / هتكتب محامي حر او محاميه حره .

الخانه الثانية : العنوان / هتكتب فيها العنوان الموجود بالبطاقه الضريبية او الكارنية .

الخانه الثالثة والرابعة :  موجودة في أول مربعين في الجدول ( 501 )               إيرادات المهن الحرة و غيرها من المهن غير التجارية ، ودول عباره عن صافي الدخل بتاع حضرتك عن سنة الاقرار 2020  ، ودي  هتكتبها في الخانة اللي علي اليمين ( وهتكتب صافي دخلك فيها وخد بالك ان أقل من 15000 جنيه معفي وما زاد عن ذلك فهيدفع ضريبة ) ، والخانة اللي قصادها علي الشمال هتكتب فيها صافي دخلك عن سنه 2019 ولو مش متذكر قدمته بكام السنة الماضية اكتب اي رقم بس لا تزيد عن  8000 جنيه ( طيب واللي لسه معفي ودول بتوع الخمس سنوات هتكتب في الخانتين دول صفر ) ولا تملئ غير الخانتين دول بس في الصفحه دي بعدها هتتملي كلها تلقائي وهتضغط علي السهم الأصفر اللي علي الشمال ثم

16 - هتظهرلك صفحة إيرادات العقارات المبنية ( دي ملناش دعوه بيها متكتبش فيها حاجة ) ثم

17 - صفحه قائمة الإقرار التفصيلية ( دي ملناش دعوه بيها متكتبش فيها حاجه ) ثم

18- صفحة مقدار الضريبة المستحقة : التسوية ( مدين / دائن )

ودي هتعمل فيها حاجتين فقط لا غير

الاولي :  خانة (06) قيمة المساهمة التكافلية ( ودي هتحسبها ازاي ) اقول لسيادتك لو اقرارك بالف جنيه هتكون اتنين جنيه ونصف

لو ألفين جنيه  = خمسة جنيه .

لو 3 الاف جنيه  = سبعة جنيه ونصف .

لو 4 الاف جنيه  = 10 جنيهات .

وهكذا كل ألف جنيه كدخل مفروض عليها اتنين جنيه ونصف

وبعد كتابة قيمة المساهمة التكافلية هتدخل علي ملئها

الخانه الثانية ( الفترات الضريبية المنتهية )  ودي أهم خطوة حتي يقبل الإقرار

هيظهرلك خيارين هتختار خيار بعد 5 / 7 / 2020  طيب لو اخترت الخيار الاول قبل 5 / 7 / 2020 انسي اقرار لن يتم قبوله

وبعد كده هتضغط علي السهم الاصفر اللي علي الشمال وهيدخلك في صفحه تالية اللي هي ( الفترة الضريبية )  هتلاقي فيها بيانات مكتوبة وجاهزة اسم سيادتك والفتره من 1 / 1 / 2020 الي 31 / 12 / 2020 / واسم المموول مكتوب وجاهز  /  وبالنسبة لإسم المحاسب / المكتب التابع له المحاسب ورقم القيد دول ملناش دعوة بيهم وهتضغط علي خانة حفظ الإقرار ثم تضغط  ok  وهل أنت متاكد من إرسال الإقرار هتقوله نعم

( وبكده تم ارسال الإقرار ولكنه لم يقبل بعد إلا بعد سداد المساهمة التكافلية )

-------------------------------------------------------------------

سداد المساهمه التكافليه  بيتم ازاي

1- هتدخل علي خانة ( خدمات ) اللي موجودة جنب كلمة ( حسابي ) ( ضريبه القيمة المضافة ) وهتضغط علي كلمة (  خدمات الدفع الالكتروني ) ثم هتضغط علي كلمة (  إضافة ) اللي موجودة تحت كلمة بحث - إعادة تعيين وبعد الضغط هتظهرلك صفحه بعنوان (  انشاء طلب سداد دخل ) هتختار كلمة ( الفترة الضريبية المراد السداد عنها ) هتختار كلمة  2020  ثم هتظهرلك في الخانة اللي تحتها كلمة ( 101 ) واللي تحتها كلمة المساهمة التكافلية ثم تحتها كلمة (  قيمة الضريبة المراد سدادها ) هتكتب فيها قيمة المساهمة التكافلية اللي شرحناها فوق عن كل الف جنيه كدخل صافي اتنين جنيه ونص وفقا لدخلك الصافي

2- بعد كده هيدخلك علي صفحة السداد ( هتحط رقم الفيزا وتاريخ الانتهاء - والتلات أو أربع ارقام اللي مكتوبين في ضهر الفيزا ) وهتجيلك رسالة علي الموبايل انه تم السداد

وهتجيلك رسالة برجاء غلق الفتره الضريبيه ---- متروحش لاغلاق الفترة الضريبية الا لو كان صافي دخلك اللي انت كاتبه في اقرارك ده  اكتر من 15000 جنيه

وبكده تم قبول الاقرار الضريبي

ملحوظة : 

 أي مساهمة تكافلية بتتسدد بيتم اضافة 17 جنيه رسوم خدمة يعني الخمسه هتسدد 21 والعشره 32 جنيه

-----------------------------------------------

ومتنساش تكتب اميل الياهو ورقمه السري واميل الضرايب ورقمه السري المكون من 8 احرف وارقام واول حرف منه كابيتال في ورقة وتحتفظ بيها لانك مش هتقدر تقدم اقرارك الضريبي الا لو اتممت الدخول الصحيح

-----------------------------------------------

وعايز تعرف اقراراك اتقبل ولا لاء هتدخل علي خانة ( ضريبة الدخل )  ومن ثم اختار عرض الاقرارات عن سنه 2019 او عن سنه 2020 وتدخل عليه هيتم عرض الاقرار اللي قدمته .

----------------------------------------------

وعايز تعرف المساهمه التكافليه اتقبلت ولا لاء هتدخل علي بند خدمات ثم الدفع الإلكتروني وإنشاء طلب سداد دخل وتختار سنه الإقرار 2020 فان تم قبول سدادها من قبل هتظهرلك كلمة  ( لقد تم غلق الفترة الضريبية لسنه 2020 ويمكنك تقديم طلب سداد بقيمة بند المساهمة التكافلية عن تلك الفترة علماً بأن نسبة المساهمة التكافلية هي 2.5 في الألف من إجمالي الايراد ) وبكده سيادتك تم قبول إقرارك الضريبي بسداد المطلوب من إشتراك بوابة و مساهمة تكافلية .

-------------------------------------

 ومتنساش تطبع اقرارك الضريبي وهتطبع بس ثلاثه ورقات الاولي والثالثه والسادسه فقط

-----------------------------------------------------------

وهتطبع بطبيعه الحال سداد المساهمه التكافليه من خانه خدمات الدفع الالكتروني ثم اختار طباعة اخطار

-------------------------------

وهتطبع بطبيعه الحال قيمه السداد الاخري ودي من خانه حسابي ثم اختيار اخطارات السداد الخاصه بالاشتراكات - معاينة الاخطار  ثم طباعة